اسمحوا لى اليوم ان انقل اليكم مقال (او قصه قصيره) لا اعلم ايهما اسمى ، الا انها اعجبتنى كثيرا كثيراً (بصراحه) لذا احببت ان انقلها لكم قبل ان اتكلم فى موضوعى القادم ان شاء الله.

البوست من مدونة الاخت العزيزه (سبهلله) (0مهندسه زميله بس من منازلهم)) بس جيده.

هذه هيه المقاله وهى بعنوان " ويدوم الحب":

....................

"انهاردة فات على جوازها عشر سنين

وإكتشفت إنه بعد العشر سنين دول لسه ما حققتش حاجات كتيرة كانت بتحلم بيها قبل الجواز وفى اول سنوات الجواز

وان أحلامها إتبخرت مع زيادة الأعباء والمسئوليات والاولاد
وفجأة عدى عليها عشر سنين
سابت كل اللى فى ايديها وراحت قعدت على الكرسى المفضل ليها فى البلكونة وسرحت وبدأت تكلم نفسها

ايه دة ؟ انا ليه احلامى ما اتحققتش

ليه لسه عايشة فى شقة ايجار وما اشتريتش التمليك ؟

ليه ما فتحتش العيادة اللى كان نفسى فيها واكتفيت بالقعدة فى البيت سنة ورا سنة عشان مصلحة الاولاد والزوج والبيت؟
ليه لسة ما اشتريتش الاجهزة الكهربية اللى ناقصانى ؟

كان ناقصنى مكنسة.. ليه بقالى عشر سنين بكنس البيت بالمقشة ومش واخدة بالى ان المكسنة مش موجودة ؟
كان نفسى فى مايكرووف لانى لما شفته عند فلانة عجبنى اوى وحسيت انه عملى جدا وسريع ومع ذلك ليه نسيت اشتريه؟
كنت محتاجة تليفون لاسلكى اتحرك بيه فى البيت وطلبته من زوجى بس ليه ما اتهمتش انه يجيى ؟

كان نفسى فى سيارة خاصة بيا لوحدى عشان اعرف اتحرك بيها انا والاولاد وما نعتمدتش على سيارة زوجى اللى غالبا معاه فى الشغل

ليه ما اهتمتش انى احقق الحلم دة؟

كان نفسى اشترى علبة مكياج بس تكون ماركة Lancôme لان بتاعتى وانا عروسة خلاص خلصت وقدمت .. ليه ما اشتريتش العلبة؟ عشان هى غالية اوى ؟ ولا انا شايفة نفسى حلوة اوى ومش محتاجة اصرف مبلغ كبير زى دة فى حاجة تعتبر رفاهية ؟

ليه ما اهتمتش انى احقق كل احلامى ؟
هل دة نوع من الرضا بالموجود والمقسوم ؟ الحمد لله راضية جدا
ولا انا شايفة انها كماليات وفى حاجات تانية اولى انى اجيبها ؟

ولا انا انسانة غير طموحة ؟

ولا يمكن عشان عندى فى حياتى مميزات اكبر بكتير من كل اللى فات
الحمد لله مازالت حياتى الزوجية مستمرة بدون مشاكل تذكر فى وقت صعب فيه استمرار الحياه الزوجية خاصة وان حوالى سبعة من صديقاتى إطلقوا لاسباب مختلفة وكلها اسباب جوهرية للطلاق زى بخل الزوج او اهانات الزوج باللسان واليد او تدخل الاهل فى الحياة الزوجية او ضعف شخصية الزوج .. الخ

يمكن وجود ولادى فى حياتى نعمة كبيرة جدا وأى حلم جنب النعمة دى بيكون صغير اوى اوى خاصة وانا شايفة حالة صديقتى اللى كانت زيي بتحلم بالتمليك والسيارة والحمد لله عندها حاليا الشقة التمليك والسيارة الا انها نفسها فى نونو والغربية ان معندهاش لا هى ولا زوجها اى موانع.. سبحان الله

ولا يمكن انا حالى احسن من بنات كتير فى سنى مازلن انسات وهم فى سن ال 35 وما فوق وبيحلموا بزوج وبيت اقل من اللى انا فيه بكتير

فجأة رن جرس الهاتف وكان المتحدث زوجها :
- مش عايزة حاجة يا حبيبتى انا جاى فى الطريق ؟
- ايوة يا حبيبى ما تنساش تجيب لى مكنسة وانت جاى
- نعم؟؟؟
- قصدى ماتنساش تجيب عصاية للمقشة وانت جاى اصل العصايا الموجودة اتكسرت امبارح
-حاضر يا حبيبتى من عينيا

وبعد فترة إذا بزوجها يدخل البيت فى إيدة مكنسة كهربائية وفى وجهه إبتسامة قائلا

- كل سنة وانتى طيبة يا حبيبتى انهاردة عيد جوازنا وقلت بدل ما اجيبلك عصاية للمقشة وكل شوية تكسرى واحدة

قلت اجيبلك دى أوفر ههههههههههههه (ضحكة وبوسة على خدها )
- ربنا يخليك ليا يا حبيبى ( وإترمت فى حضنه)
- ربنا يقدرنى واجيبلك كل اللى تتمنيه يا حبيبتى
- ربنا يديم علينا نعمه ويخليك لينا ويخليلنا الولاد ويدوم الحب بيننا يا حبيب عمرى "

.........................................

انتهى

دية المقاله

ولا اعلم الى الان المغزى الحقيقى للمقال الا انى اخذت المعنى القريب من رغبتى وهو دفئ الحب الاسرى العفيف الذى افتقدناه جميعاً.

خلص الكلام ...............

وتعليقى المقال القادم ان شاء الله.

ملحوظه : بسبب هذا الموضوع وبعض احداث توالت لقد طرأ فى ذهنى فكره جيده على ما اظنها الا وهى : اننى سوف اقوم بأنشاء مدونه اخرى ان شاء الله لن اكتب فيها مقالات تخصنى اكثر من انى سوف اتنقل بكم اعزائى فى جولة بين رحيق المقالات والمدونات والتعليقات التى سوف تعجبنى واظن انها من الممكن ان تعجبكم ايضاً باذن الله . واظنى بدأت بهذه الفكره اليوم بمقالة الاخت سبهلله الا انها بعد ذلك ستكون فى المدونه الجديده باذن الله.
سلام